| Главная » Статьи » Работа Фонда » СМИ О НАС |
Дика дIа-хьа даржар
| Дукха тайпара фондаш я вай мехка шоай тарлучох наха гIо-новкъосталаш деш. Хьалха ишта фонда я аьнна хезача наха тамаш еш ханаш яр. Бакъда, хIанз массехк я уж, хетаргахьа иттанега дIакхоачаш. Фондаш хилар а, кхычарга хьаштдолчарна гIо де уйла йолаш нах хилар а дика да. Цхьаволчунга долаш шоллагIчунга доацаш хул хIама. Рузкъа дар а доацар а Дала зувш ва, дийшача наха хьаяхачох из шийга долчо мичахьа, малагIча наькъаца дIадохийт хьажеи, доацачо са мишта тоха хьажеи оттадаь. Цу шинна а даькъе болча наха нийсагIдар, Даьла раьза хургвар хьадеш хилча дунен чу а Iеле а дуккха аттагIа хургда. Вай мехка дукхача наха йовзаш цIихеза я «Мял» яха фонд. Юххьанца 2009 шера болх болабаьча хана доххьал, коляска чу багIаш лелаш боацача наха гIо-новкъостал деш, цар хьашташ кхоачашдеш мара хиннаеце а тIехьагIа кхы а заIапал дола нах хьагучабувларца, массадолча даькъе унахошта гIо-новкъостал деш, цул совгIа балха тIа ка яргйола заIапхо цига дIанийсвеш а къахьегаш хьайоагIа «Мял» фонд. МоллагIдола хIама дIадоладеш хилча, цунна хьалха латташ саг хила веза. Дега кIаьда, оамала атта, хьаькъала кIоарга ца хилча хала да хьалхаваьнначоа ше хьалаьца никъ ма хетта дIачакхбаккха. Цудухьа укхаза аьлча нийса хургда, цу фонда хьалха латтараш иштачарех ба, аьнна. ГIалгIайчен халкъа гуллама депутат йола Дзейтанаькъан (Цхьорой) Хьусена йоI Лейла я из фонд хьакхеллача гIоне цу юкъарчено кхоачаш беш бола болх ма хетта дIахьош, лерттIа чакхбаккха уйла йолаш дIагIерташ. Дукха да, наьха хьал аттача доаккхаш цу къахетама юкъарчено кхоачашдеш тайп-тайпара балхаш, проекташ. Укх наькъа уж массаергаш ювца а царех дош ала а сона ха тоаргьяц, цудухьа сона дувца лов цхьан пректах лаьца. Шийгахьа боккха пайда болаш а, хьоанал йолаш а, кхы мел дар дIадаьлча саг моцало кIалвутаргвоацаш а болх ба из, нагахьа санна ишта дIабоде. Шоана цхьаболчарна хеза хила а тарлу цу проектах хIама. 2014 шера йолайир «Мял» фондо «Бумеранг добра» яха проект. Уж ши дош даьшхача цо хьакхувдадеш долча маIанех керттерадар да, цхьанне даь дика дIа-хьа даржаш кхычунга доалаш хилар. Из да цхьаннега кхаьча дика цига ца а соцаш кхы а дIахо хала боахка миска дезалаш чулоацаш дIахододаш хилар. Из проект мишта дIайолаелар а, цо кхоачашдер фуд а доашхаш къамаьл хилар тха «Мял» фонда кулгалхочунца Дзейтанаькъан Лейлайца. Из проект ше, эшача наха етт Iалашбеш, цо Iодаь Iаса кхычунга кхоачаш ишта цу наькъаца йодаш я. Ала деза Лейла ше коляска чу ягIаш, когаш а кулгаш а дика лелаш доацаш унахо хилар. Яле а дог ца эккхаш, ца йохаш, ше хьалаьцача наькъ тIара ца йоалаш хьайоагIа из. Цунга хьежжа Дала гIо а ду цунна цо хьегача къингахьа. — Лейла, эггар хьалха из проект дIа мишта йолаелар оаша, мичара хьадоагIаш да из гIулакх? — 2014 шера дар из. Диъ шу хьалха хул-кх из. МагIалбикера цхьа дезал баьхкар со йолча, ишта лелабе етт хуларе гIад а даха из лелабергбар оаха, цу оагIорахьа тхона де новкъостал дий шун аьнна. МоллагIа саг вена леткъача, цкъа хьалха цун хьал тохк оаха. Даха тхо хьажача уж дезал бокъонца хала боахкаш, цхьаннахьа арий ара зIамиго цIалг а оттадаь, шоашка хьаькхаьчача хIамах шоай дезала Iалашо еш, шоашта цIа деш бар. Цу дезала да ше балхара а, дехьара а сехьара а даьккхача хIамах кхоачам а эцаш шоашта чуIе цIа деш вар. ДIаоарцагIдайна «Единая Россия» яхача парте доакъашхочо Мартазананаькъан Беслана а гIо деш, тхоай ахча Iоадеш йолча яшка чура ахча вIашагI а теха цу дезала етт ийцар оаха. Маьха тIа хьалуш бетташ дика етт корабаьбар цу дезала шоашта, из эца ахча делар оаха царна. ХIаьта цар, шоаш ма дувццара шоашта етт ийцар. Иштта цу тайпара из болх дIахо бихьача бакъахьа бар-кх аьнна хеташ из проект кхы соца ца еш дIахо йолайир оаха. — Мискача наха из етт балар шийгахьа малагIа пайда болаш, фу кхоачашдеш гIулакх да? — Бетташ бола етт дика ба, боккха мара цахиларах дезал кхаба. Цунгара яьккхача шурах, тIоа, еташура, берхI, кIолд, налх, даьтта, морз, нахча, шар, лок иштта кхы а дукха хIама Iалашде йиш я. Кхача ба из. Дааргахьа совдаьнна хIама хуле цу Iаттагара хьахулаш дола сурсат нахага дохкаш ишта а пайда бе йиш я цу дезалга. Iа чIоагIденнача бетташкахьа даа доакъар Iалашдичахьа дIахо дукха зе де дезаш бац етт. Iуйранна дIаара лаьллача, денна баьже, сарахьа шортта Даьла беркат а дахьаш, дарба а дахьаш юха чубоагIа из. Цудухьа из проект дIахо яхача бакъахьа хеташ болх ба оаха цу тIехьа беш бар. — Цу проекта цIеро хьакхувдадеш дола маIан да-кх шийгахьа дола дика кхычунга кхоачаш хилар. Из миштад? — Нагахьа санна оаха дIа а бига сага етт дIалой, цунца барт язбу оаха цу Iатто Iодаь хьалхара Iаса, ше мо етт эшаш болча дезала дIа а дихьа цо дIалургдолаш. Мича хов Iаса дилехьа цар из етт бохке а, е дулха буй а. Из да кхычунга из дика дIадоалаш хилар. Оаха дIаденна бежан дIакхаьча саг цо хьалхара даь Iаса кхыча оаха белгалбаьча наха дIадала дезаш ва, цул тIехьагIа ший хьаштдале из етт бохка а бе а ший лоIам ба цунга, амма баь барт кхоачашбе беза цкъар. Из оаха ишта оттадаьд дIаденна бежан мича дахар ца ховш дайна дIадаргдоацаш, дIахо цох боалаш бола пайда баржаргболаш. — ТIаккха цу проектаца масса дезала гIо даьд оаша ишта? — Проект йолаелчахой 7 дезала новкъостал даьд оаха ишта бежан даларца, Iаса луш а, шинар луш а, етт луш а. Тхога цу гIулакха Iоадаь улаш ахча мичад, лаьрххIа етт эцаргба вай, аьнна. Цудухьа тхоай аьттонга хьежжа бу оаха из болх. Из гIулакх вIаштIехьадоал цхьацца къахетаме дог долча наха дакъалацарца. Вай дIауйла йича доккха хIама да из етт яхар. Лакхе вай хьоаха ма дарра шийгахьа доккха беркат долаш хIама кхоллам ба етт, дезала доккха гIулакх хул цунгара. КIалдисача дулха де а, дIадохка а йиш я бежан. — ХIанз малагIча даькъе латт из проект, дIахойодаш йий из? — Кхы соцаяь хIама дац тха из, бакъда, моллагIдола хIама дIахо додац из хьаллоацаш цунца гIо деш нах ца хилча. Цудухьа шоай аьттув болча наха цу юкъе дакъа лацар чIоагIа лерхIам болаш да. — ХIаьта нах дукха бий из етт эшаш а, хилча цунца дог гIоздаргдолаш а. — Цу тайпара дезалаш болаш ба шортта. Бакъда, царна дIадала доахан-хьаьлий тхога дац. Цудухьа эшаш ба тхона уж нах а, цар дакъа лацар а. МоллагIа вай цхьана хьадеш дола хIама шийгахьа пайда болашагIа а, наха беркат дукхагIа хулаш а, наха юкъе барт беш а да. ВIаший дага а дувлаш, эшачун оагIо хьаллоацаш наьха къел дIайоаккхаш вай къахьегар – доккха ниIмат да. Тхо массаза кийча да нах тIаэца а царга ладувгIа а. — Лейла, Iа ма хьоадирий шоашка цу проекта хьожадаь уллаш ахча дац, амма етт эшаш дезалаш болаш ба аьнна. Нагахьа санна цу мо болча дезалашта из етт дIабала чам болаш саг хуле цо фу дича бакъаха да? — Цу тайпара уйла йолаш, аьттув болаш саг хуле доккха гIулакх да из эггара хьалха эшачарна. Цул совгIа цу сага шийна маьл а ма бий. Цхьавола саг хул ший цIи яккха безам боацаш, ше мала ва хьа ца хайташ къайлагIа сагIа луш, цхьавар хул ше даь дика бIарга а дайна кхычар из дIахо дихьача бакъахьа хеташ. Из доацаш цхьакха тайпара саг хила йиш я из мо дола гIулакх ше дIа наIарга а ваха де чам болаш. Из вале а вож вале а башха вац цу мо волча саго тхога хоам хьабой оаха цунга дIааргда уж дезал мичахьа бахаш ба, нагахьа санна хьабена етт тхога хьалой дIа а бихьа дIалургба, юхьанца аз бийца барт язбирца, кхыча мискача дезала цу Iатто даь Iаса дIалургдолаш. — Iа аьлар тхьовра 7 дезала ишта цу наькъаца гIо даьд оашош аьнна. Царех цхьаккха дезал бий цу шоашка дIакхаьчача бежанах пайда эцаш? — Болаш ба уж нах. Оаха цхьа моллагIа араюкъе гIолла малув ца ховча сага етт ла а луц. Оаха Iаса денна а, етт бенна а цу проекта юкъе бахараш цIена дог долаш, харц лувргбоацаш, шоашка дIакхаьчар лорадергдолаш нах ба, бокъонца хала боахкаш миска нах болг а ховш. Царна доккха хIама да из царга дIакхаьчача, цар доаккхал а ду цох. Хьажал, тхьовра вай дийца даар Iалашдарал совгIа кхы а беркат доал цу гIулакхах. Нагахьа санна цу дезале кхувш доагIаш бераш дале уж къахьега а, къахетаме хила а Iомабергболаш хIама да из. ХIама хьадеш вола саг харц варгвац, бакъда, мукъавита саг атта лела Iемар воал гоал. Тхо тешаш да, цу проектах хьокхабенна дезалаш къахетами, къахьегами, фуд ховш хургхиларах. — Дала аьннадале ишта хургда из. Са хаттараш чакхдаьннад, хIаьта цу проекта тIа гIолла нахага кхы ала хIама дий хьа? — Эггар хьалха баркал ала безам ба са цу проекте дакъа мел лаьцача наха. Дала шоаша леладеча хIамах беркал доаккхалда царна, шоай дезалашкахьа а, дикаш хьадаргахьа маьл баккха а Дала совбоахалба уж. МоллагIа вай даь дика довргдоацалг диц а ца деш вай къахьеге вай хьал дикагIча оагIорахьа тоалургда. — Дика да Лейла, шун болх Дала беркате болба. Тешаш ва со, укх проекте дакъа лаца нах овттарг хиларах, хIана аьлча, дукха хIама лайна къахетами, мискали фуд ха декхарийла долаш къам да вай дар. Бусалба Iилма дийшача наха хьадувцаш да вайга Дала Къуръана чухьа аьннад яхаш: «Дала шун хьал хувцаргдац, оаша шоаша из хувцалца». ЧIоагIа маIан долаш дешаш да уж. Массавар оацагIа а ваьнна дикагIча оагIорахьа воай хьал хувца деза вай, эзди вахар вай халкъанга хургдолаш. Дукха нах ба, таронаш йолаш а, дукха хьайбаш леладеш а. Цу «Бумеранг добра» яхача проекта юкъе а баха цу наха дакъа лаьцача доккха беркат даргдар царна шоашта а вайгара гIо эшача наха а. Бусалба нах къахетаме, кIаьда, шоайла дог лазаш, кIалвисачунга хьожаш хила беза. ХIаьта вай къама г1алг1ашта геттара хьаьнала гIулакх да из. Матенаькъан Илез «Сердало». № 99 (12035), ера, 5 июль, 2018 шу. Четверг, 5 июля 2018 года... serdalo.ru/2018/07/04/%d0%b4%d0%b8%d0%ba%d0%b0-%d0%b4i%d0%b0-%d1%85%d1%8c%d0%b0-%d0%b4%d0%b0%d1%80%d0%b6%d0%b0%d1%80/ | |
| Просмотров: 980 | |